هذي حالة من النت، تشبه أسنان مريضة جتني
تبي تقفل المسافات الأمامية بالتقويم،
طبعا بعد الفحص قررت اني ما اسوي تقويم وحولت مريضتي لزميلتي أخصائية تجميل وإصلاح الأسنان عشان تقفل المسافات بالحشوات التجميلية او الفينير،المريضة تضايقت في البداية لكن بعد ماشرحنا لها بالتفصيل اقتنعت وبعد العلاج التجميلي بالفينير طلعت مبسوطة.
كثير ناس يسألون، دكتورة ايش أنسب؟ متى نقفل المسافات بالتقويم ومتى بالحشوات او الفينير؟
راح اتكلم بالتفصيل زي ماقلت لمريضتي.
في بعض الحالات لمن نفحص الاسنان نلقى التطابق ممتاز، والأسنان مصفوفة، لكن يوجد مسافات بسبب عدم تناسق بين حجم الاسنان والفك، مانسميه ب (tooth size to arch discrepancy)يعني بالعربي حجم الاسنان صغير
هنا عشان نعطي المريض النتيجة المثالية نحوله لطبيب تجميل الاسنان والحشوات يبني الأسنان ويعطيها الحجم المتناسق الطبيعي، افضل من اننا نقفلها بالتقويم وتصير داخلة لجوا بزيادة وشكلها مو حلو وصفتها تتأثر.
لكن في الحالات الاخرى لمن يكون حجم الاسنان طبيعي وكويس ويكون فيه مسافات بين الاسنان ومشاكل في التطابق يكون الحل المثالي هو التقويم .
بالنهاية مو كل حالة تحتاج تقويم او كل حالة تحتاج فينيرز
يعتمد على التشخيص
ونصيحة لكل مريض، لمن الطبيب يحدد لك الخطة العلاجية الأنسب لك على أسس علمية ، من حقك تناقش الخيارات لكن اسمع نصيحته👍
لان الطبيب اللي يعالج المريض وهو عارف انه التقويم مو العلاج الأنسب له، اما انه جاهل
أو بياع.
#تقويم_أسنان
ليست هناك تعليقات:
إرسال تعليق